Microsoft word leh Pagemaker

PageMaker aiah MS Word kan hmang tam tial tial a. MS Word thiam lo chuan DTP hna a thawh hleih theih loh tluk a ni ta. Lehkhabu tur han puah zawha, perfect bound leh saddle stitch (PageMaker: Menu > Utilities > Plug-ins > Build Booklet) tur emaw han print dawn hian, PageMaker-a awl deuh hi MS Word-ah chuan a harsa ve thung. MS Publisher hman thiam chuan tih theih dan a awm mahna. Mahse hmang thiam lo leh nei lo kan tam si.

MS Word-a hna kan thawh sa, dan pangngaia PageMaker-a kan han lakluh (Control ) hian, PageMaker chuan a printer a mil loh chuan tab set te a titawlh a, han lakluh hian a buai nuai thin. Solfa leh chhiarkawp chhutsa laksawn phei chu buaithlak tak a ni. Chuvangin, hun tamtak senga set that leh a ngai thin a ni.

Hemi venna chu: 

MS Word-ah i duh ang tiatin i thil print tur chu duang fel phawt la. Chumi lenzawng mil chiah chuan i bel (paste) na tur PageMaker-ah phek thar hawng la. MS Word-a i hnathawh chu a phek mal te tein ahranga select-in, Control+C la, PageMaker-ah paste  suh! Microsoft Word Document object emaw Windows Metafile emaw Enhanced Metafile angin emawpaste special (Menu > Edit > Paste Special) rawh.

Mahse, MS Word atanga i hawrawp lakluh chu PageMaker chuan hawrawp angin a hre tawh lova, milem (vector graphics) angin a hre tawh a, edit theih a ni tawh lo. Microsoft Word Document object anga i lakluh chuan a original (MS Word file) kha paih lovin i lakluhna khawlah khan awm ngei sela, i thil lakluh kha PageMaker chuan edit thei lo mah se PageMaker-ah khan han click nawn la, Word lamah a zuang thauh ang a, Word-ah i edit leh thei ang. Excel te pawh chuti tho chu a ni.

PageMaker chhungah, amah leh amah inkara thil kan sawn kual chuan, eng thilah pawh paste hi a pawi lem lo. Hmun dang atanga milem (bitmap graphics) kan lakluh dawn chuan Control+D hman a tha. Khawl danga print tura file kan lakchhuah dawn chuan link option-ah ‘store copy in publication’ (Select > left click > Link option) tih thlan tur. (Mahse file a lian dawn tih hre lawk ang che) Hmanraw dang atanga hawrawp leh lemziak, line drawing ang chi chu tun tuma kan sawi ang hian, vector graphics (Windows / Enhanced Metafile etc.) anga lakluh a tha a ni.